50. urteurrenaren ondoren atzera begira jartzea zegokion Andra Mari
Dantza Taldeari, hots, ospakizunen ondorengo hausnarketa egiteko unea: alde batetik,
antolatutako ekintzen eta ideien balorazioa egitea eta, bestetik, hauen zergatiak
bilatzea. Aipatu helburuei erantzuna eman nahian, Taldeko artxibategietan sudurrak sartu
eta, liburutegiko saguak lez, jo eta ke ibili izan gara lan mardul hau sortu
arte.
Berrogeita hamar urte igaro ondoren, ugariak dira gure herriko txoko
desberdinetan egiten diren erritual eta usadio zaharren inguruan burututako ikerketa
lanak. Eta hauetatik asko Galdakaoko kaleetan errotu dira Galdakoztarren nortasunaren
parte izateraino. Hain zuzen ere, Andra Mari; Urteurren baten inguruan bezala
izendatu dugun liburu honek erritual eta ospakizun hauei buruzko azalpenak ekartzen ditu.
Hitz laburretan adierazita, irakurlea usadio zaharren nekazal mundutik testuinguru
urbanoetara eginiko aldaketaren nondik norako hausnarketa baten testigu izango da.
XXI. mendeko balore eta jokamoldeetatik eginiko Euskal Herriko
folklorearen azterketa hau berrehun koloreetako argazki multzoarekin eta kantu zaharren
letrak eta partiturekin borobilduta dago. Gure ondasunaren zaleentzako kontutan hartzeko
lana ezbairik gabe!. |
